சென்னை போன்ற பெருநகரங்களில் நகர்வாழ் மக்களின் அன்றாடப் பயன்பாடுகள் சார்ந்த குறைபாடுகளைக் கேட்டு, கண்டறிந்து உடனடித் தீர்வு காண்பது மாநகராட்சி அதிகாரிகளின் தலையாய கடமையாகும்.

இதற்குப் பெரிதும் உதவும் வகையில் பெருநகர சென்னை மாநகராட்சி அமைப்பினால் சீர்மிகு சென்னை அமைப்பின் கீழ் வடிவமைக்கப்பட்டதுதான் நம்ம சென்னை செயலி.

சாலை, குடிநீர், கழிவுநீர், மின்சாரம் போன்ற, மக்களின் அன்றாடப் பயன்பாடுகள் சார்ந்த குறைபாடுகளை குறுந்தகவல்கள் மூலமாகவோ புகைப்படம் எடுத்தோ இச்செயலியில் பதிவு செய்தால் அக்குறைப்பாடுகளுக்கு உடனடித் தீர்வு காண்பதற்கான நடவடிக்கைகள் சம்பந்தப்பட்ட மாநகராட்சி அதிகாரிகளால் எடுக்கப்படும்.

நகர்வாழ் மக்கள் தம் அன்றாடப் பயன்பாடுகள் சார்ந்த செயல்பாடுகள் குறித்த கருத்துகளையும், ஏதேனும் குறைகள் இருப்பின் அவை குறித்த புகார்களையும் இந்தச் செயலியின் மூலம் பதிவு செய்யலாம். இச்செயலி, எளிதாகப் பயன்படுத்தக்கூடிய வகையில் வடிவமைக்கப்பட்டுள்ளது. மக்களில் பெரும்பாலானவர்கள் கைப்பேசி பயன்படுத்துவதால் மக்கள் தகவல்கள் பதிவு செய்வதும் அவை அதிகாரிகளின் கவனத்திற்கு உடனடியாகச் சென்றடைவதும் சாத்தியமாகிறது.